有傳雷士照明（02222）董事長吳長江喜歡跟高手過招，又鍾意喺戰鬥中學習，佢接受《中國企業家》雜誌訪問時話，為咗學好象棋，佢幾乎「養咗」對手兩年。
話說吳董喜歡捉棋，捉象棋捉得唔錯，佢有個象棋高手朋友成日搵人對弈，但兩人水平相差太遠，呢位高手唔肯與吳董捉棋，吳董就同佢賭錢。起初呢位高手讓吳董車馬炮，之後一隻棋都唔讓，最後就唔肯再捉；不過呢位高手從吳董身上贏咗兩年生活費，傳聞話有一、二百萬。吳董證實咗呢個傳聞，坦言自己比較執着，相信只要堅持、肯學，就一定有機會。
雷士照明早兩個月至成功登陸香港上市公司大家庭，雖然股價初期表現麻麻，但吳董一啲都冇後悔，堅持話唔留番喺A股或去納斯特克市場係理智嘅決定。好彩依家股價已升越招股價，吳董總算冇令投資者及老友失望。
回想今次上市遇着歐債危機，為保險計將定價定低啲，最終都搞掂。吳董話公司過去3年都努力去完成上市夢，自言今次係背水一戰，皆因上市夢曾中斷過兩次，如果今次唔成功，人哋會以為公司有問題。佢亦好明白選擇A股上市會攞到較高市盈率，之不過佢以前曾經投資A股，總係畀人家「抬轎子」，後來堅決不買，佢形容中國嘅創業板太瘋狂，股市整體投機性較強。
余絲韻