絲絲講場：和電品牌重組力谷「3」
今時今日乜嘢都講求效益，幾網融合更係大趨勢。好似和記電訊（00215）咁，佢哋嘅流動電話及WiFi服務向來都係以「3」香港做品牌，有見「3」咁成功，集團尋日就宣布將旗下和記環球電訊嘅固網寬頻、家居電話及長途電話服務IDD0080，全部納入「3」品牌嘅大家庭，正如公司流動電訊營運總裁龍佩英話，納入同一個品牌，可以更全面發揮流動通訊及固網業務嘅協同效應。
注固網寬頻推優惠
和記電訊更加搞咗個「3寬頻無限」嘅宣傳活動去推廣呢次品牌重組，搞宣傳又點少得優惠，為配合「3」呢個大家庭有固網及寬頻兩大服務加入，「3」推出99蚊月費嘅100M家居寬頻服務（合約期30個月），99蚊100M已經好抵玩，「3」就話成功申請再送6個月100M寬頻免費或30個月家居電話服務，計一計，100M頻寬有權平到一個月唔使80蚊，堪稱全城最平，廣告出街後，唔知有冇行家跟，而最開心嘅應該係一眾網民。
余絲韻