絲絲講場：馮孝忠挑戰「乒乓孖寶」
恒生銀行（00011）剛周日為員工舉辦咗一年一度嘅「恒生團隊盃」乒乓球賽，除咗吸引70人參賽外，恒生總經理兼財資及投資業務主管馮孝忠（Andrew）、「乒乓孖寶」李靜及高禮澤亦到場為參賽者打氣。難得與體壇健將同場，Andrew當然唔會放過呢個大好機會，落場與「乒乓孖寶」一較高下啦。
團隊盃賽日齊切磋
縱然「勁敵」當前，Andrew又唔係專業乒乓球運動員，但佢一啲都冇怯場，亦冇雞手鴨腳，輕鬆淡定咁完成比賽，身為「賓卡」嘅佢平時見慣大場面，所以零舍有大將風範。「乒乓孖寶」亦分別與一眾唔同組別嘅冠軍得主切磋球技，仲大讚參賽者球技不凡，水平可與精英運動員媲美。
其實恒生的確幾注重員工嘅身心健康㗎，除咗乒乓球，佢哋每年都會舉行其他體育比賽，包括足球、高爾夫球、籃球及保齡球賽事，希望鼓勵員工做多啲運動，佢哋仲喺九龍灣MegaBox設有員工康樂中心添。
余絲韻