市場熱線：旭光展新升浪

本地魚缸昨日竟未受影響，接近平開，但早段曾一度腳軟，恒指曾低見20,384點。缸邊友對祖國房產稅或於兩年後才實施，紓緩屋仔市場或再調控的憂慮，帶動紅色地主跟紅色錢莊上升，祖國魚缸跌唔落，下半場更加快動力，深滬魚缸均升逾1%。

市底轉強成交未配合

本地魚缸再一次在祖國魚缸強勢下，反覆向上收復失地。恒指收報20,589點，接近全日高位，倒升102點，國指升64點，收報11,754點。表叔線話有資金流入買紅色分子，芬佬線就話鬼子佬嗰邊未有入場「濕平」，所以成交額只有542億元。其實古勝都講咗，正係成交奀豬，大戶要操控魚缸上落易如反掌，即使呢幾日市底係轉強，但要捉路唔容易，炒股唔炒市，咪搵自己笨。

藍色大隻佬只有6個成員下跌，但只有首三名排位的大隻佬升逾2%，分別係冠軍招商局（00144）升4.34%；九倉（00004）跟二奶電話（00762）均升逾2.3%。中銀香港（02388）連升7日，升近1%，收報19.36元，主要係人仔業務擴大。

大笨象（00005）同祖國移動（00941）靠穩，分別收報75.95元及78.45元。「油魔」腳軟，石油股落後於大盤，但仍錄得升幅，中海油（00883）升0.16%報12.86元，中石化（00386）亦升0.32%，收報6.19元。

賣地在即，本地地主反彈，預計山頂地皮拍賣又係天咁高。「高佬盛」話，實物地產市場表現與預期一致，預計一○年本地住宅價格上漲15%，明年進一步升10%。

續透過購併擴大規模

農行（01288）昨升逾2%，帶動其他紅色錢莊做好，農行A股（601288）更創出2.75元人仔價新高，較登場價升1.9%。「最信」吹水報告指，農行H股的成交已有所回升，有芬佬基金入場刺激股價做好。

旭光（00067）股價上周開始回升，昨日升近2.9%，收報2.13元。公司管理層較早前表示，預期今年普通芒硝及特種芒硝產量持平，藥用芒硝產能則由去年的10萬噸大增至現時的30萬噸，相信芒硝價格穩定上升。加上集團已鎖定購併目標，預期年底完成，購併價格不會太高，集團資金充裕，毋須融資。

呢一番話，重新燃起投資者對旭光的熱情，刺激近日股價做好。集團今年上半年銷售急增，其中藥用芒硝產銷大增而錄得可觀增長，而3種芒硝價格亦較去年上升，預測全年盈利7億元，同比增長32%；每股盈利折合0.413元，按年升18%，現價市盈率只有5.1倍，絕對係超值，股價見3.3元，市盈率亦不過8倍。

戰報

恒鼎實業（01393）+10%

高仁昨日推介的恒鼎，昨日一度升過上6.52元，以低位5.95元計，單日升幅接近一成。

卡姆丹克（00712）+7%

古晨昨推介卡姆丹克，中段雖一度回落至1.84元，但午後穩步回升，高見1.98元，單日升幅達7.6%。

古勝