「股神」巴菲特揀股「點石成金」例子見得多，估唔到佢揀書一樣掂。早前有報道指股神同人講，話《When Money Dies: The Nightmare of the Weimar Hyper-Inflation》呢本書對依家嘅情況好有參考作用，結果呢本舊書即刻熱賣，登上亞馬遜嘅英國最暢銷書榜第18名。不過又有傳媒引述股神話，佢聽都未聽過呢本書喎。
市場傳言講到繪聲繪影，話股神向一位荷蘭金融界人士話，呢本書充分顯示作者Fergusson嘅智慧，呢位才俊之後就即刻買咗成幾百本，諗住寄畀荷蘭政府及歐洲央行。呢本書係講納粹德國冒起前，政府大灑金錢引致超級通脹，嚴重打擊經濟，咁啱依家唔少政權都係諗住靠政府開支挽救經濟，有啲人就乘勢話股神都係反對政府開支太大。點知依家股神話聽都未聽過呢本書，真係非常反高潮。
余絲韻