唔經唔覺，又到咗學生放暑假嘅時候，放假梗係要Happy吓啦。除咗受歡迎嘅日本同歐美團，唔知大家有無打算去中國內地嘅山川名勝走一轉呢？自然資源極為豐富嘅雲南省可能會係大家其中一個選擇。
其實，雲南素以美麗豐饒而聞名於世，被外界冠以「動植物王國」、「有色金屬王國」及「藥材寶庫」等。講咁多都係希望大家留意吓近日業績大幅增長而走勢勁揪嘅雲南實業（00455）。
顧名思義，雲南實業係扎根於雲南嘅大型民企，主要核心業務包括醫藥生物技術、礦產能源以及包裝印刷等。由於雲南嘅地理面貌奇特，除咗風光如詩如畫之外，亦蘊藏着極為豐碩嘅天然資源，成為企業增長動力嘅火車頭。近期最新公布嘅財務報表中顯示佢嘅營業額升咗46%，而每股基本盈利則大增近7倍，真厲害。
事實上，雲南實業亦具有中國內需概念，加上持有兩間彩印公司嘅投資。而且呢類紙製品嘅市場需求比較穩定，所以即使喺經濟環境轉差嘅時候，都可以為公司提供一個相對較為穩定嘅現金流，令佢哋可以頂得住。觀乎大市呈現上落市格局，雲南實業可能會為投資者喺股票市場上帶嚟新嘅激發點。
香港大學電子金融服務榮譽助理教授 徐燦傑