有「歐洲股神」之稱嘅富達投資總裁安東尼‧波頓，靜咗一排冇出現公開場合，佢尋日見記者朋友，就花心思為每人送上見面禮，禮物就係一本佢去年嘅著作《Investing Against the Tide（逆勢出擊）》。
喺完場時，佢仲逐本書簽名及寫上記者嘅名，夠晒窩心，但礙於時間有限，拎唔到簽名嘅朋友就留番張卡片，等佢之後慢慢簽，真係估唔到「股神」咁親民。
波頓咁來去匆匆，因為下周一及周二佢就要飛到北京和上海，出席公開演講之餘，順道搞個新書發布會，推介佢呢本《逆勢出擊》嘅中譯本簡體版，親自與內地嘅「粉絲」交流。呢個發布會係歡迎公眾人士參加，內地「粉絲」出名熱情款待，唔知股神慣唔慣呢？
余絲韻