霸王（01338）日前受到洗髮水產品可能含二噁烷影響，尋日復牌後股價再急瀉7.9%，而銷售保健產品嘅瑞年（02010）亦受牽連，尋日股價跌咗4.58%。銷售營養保健品與賣洗髮水本來係風馬牛不相及，點解會受牽連？皆因里昂證券報告日前將呢兩間公司拉上關係，話霸王事件引起大家對產品安全嘅關注，而瑞年賣保健產品，產品安全更為重要。兩者亦有相似之處，係最直接可比較嘅同業，故瑞年無可避免受事件影響。
不過，呢位澳洲籍嘅里昂分析員Dee Senaratne亦不忘指出，話瑞年嘅氨基酸保健產品已銷售逾5年，從未有問題出現，佢自己本人亦飲用有關產品，至今亦未有問題發生！佢預料瑞年未來數日股價仍可能出現波動，不過佢相信係買入嘅機會。里昂對瑞年嘅投資評級係「買入」，目標價6.49元，瑞年尋日股價就收報5.83元。
余絲韻