絲絲廣場：農行上市挑戰大 張雲：要日賺8億
農行（01288）A股尋日掛牌，終於完成四大國有銀行上市嘅使命，咁大日子，除咗農行管理層之外，包括上海證券交易所理事長耿亮在內嘅內地監管機構要員，以及上海市副市長屠光紹都有到場。農行行長張雲喺A股上市之後話，農行每日花費超過3億元人民幣，所以佢自己每日放工前必須賺回8億元人民幣以上，先可以回報股東，呢個亦都係對佢最大嘅挑戰。
至於農行H股就會喺今日登場，全港3萬多名「一手黨」可唔可以刀仔鋸大樹，就要睇農行今日嘅股價表現。
H股掛牌場面鼎盛
農行H股今日嘅上市儀式將非常隆重，據聞多位中港巨頭齊齊出動，香港方面，估計特首、財爺、陳德霖、夏佳理等都會出席，至於內地亦派出多名高官，好似有中證監、中銀監及中聯辦嘅代表。主人家農行當然亦會率領一眾高層來港，包括董事長項俊波以及張雲等，所以話場面肯定熱鬧。至於農行慶祝上市嘅高潮，必定係嚟緊周日喺北京人民大會堂舉行嘅大型慶祝酒會。
余絲韻