任志剛自退下金管局戰線並「過埋冷河」後，身上揹住嘅職銜就愈嚟愈多，佢喺「冷河期」時已擔任中國金融學會執行副會長一職，跟住就做咗中大全球經濟及金融研究所傑出研究員，以上職銜都係學術性嘅範疇；「冷河期」一完結，任總更加腳踏商界，喺建行（00939）董事長郭樹清嘅垂青下，最終出任建行非執董。
不過以佢嘅個人能力，應該可以做多幾份工。中投就識貨嘞，識得搵任總做其國際諮詢委員會委員，尋日先至發出有關公布。中投就大家都識，至於佢哋呢個委員會係乜料，大家未必清楚，原來呢個委員會係由國際知名專家及人士組成嘅內部非常設性機構，主要職能係對中投重大發展戰略、境外投資戰略及重大決策提供諮詢，加深中投對國際宏觀經濟形勢、全球金融市場、投資環境嘅了解，以拓寬決策思路。
任總以前喺金管局主政嘅時候，都要負責外匯基金嘅工作，又要經常接觸海外嘅財金官員，洞察國際金融形勢發展，依家中投搵佢做委員畀意見，相信必定獲益良多。
今次中投唔單只搵任總，亦同時委任大摩主席麥克做呢個委員會嘅委員，希望中投有兩名大將幫手，日後喺海外投資嘅時候，唔好咁多觸礁事件啦！
余絲韻