保協去年開始大舉進軍太陽能行業，佢哋喺徐州嘅20兆瓦太陽能電站去年底開始投產，絲絲早排去參觀，點知一去到就見到一塊塊嘅太陽能模板下面，竟然有好多草同嫩苗。
員工耕種有錢分
保協投資者關係嘅周江波話，太陽能電站嘅英文名係「Solar Farm」，原本係形容一塊塊嘅太陽能模板好似一幅田地咁，但朱老闆就私人「掏荷包」買種子，畀員工喺太陽能模板下面種吓花生、番薯及西瓜咁，實行「地盡其用」。
絲絲仲聽講朱老闆好闊綽咁話，第時有收成嗰陣，農作物嘅收入就同員工一人一半。絲絲聽到保協有員工口痕話，不如第日開放電站畀學生及遊客參觀，實行搞吓愛國教育。
余絲韻