滙豐每年都會推出股份儲蓄計劃，畀員工以八折認購滙控（00005）股份，供滿期之後，就可用擬定嘅行使價買貨，或者攞番啲錢。話咁快今年八月二日又到結算期，不過有人歡笑有人愁，去年以低價參加一年計劃嘅人差唔多賺成倍，相反喺3年或5年前參加嗰批就得啖笑。
去年受金融海嘯影響，滙控股價大插水，有一段時間喺低位徘徊，所以儲蓄計劃去年個價絕對係「至抵價」，只需37.8797元，較昨日收市價73.9元足足差成倍，參加一年供款計劃嘅員工喺下月就可輕鬆套現，參加3年及5年計劃嘅雖然仲要供，不過應該可以有排賺。
至於喺○七年參加咗3年供款計劃以及喺○五年參加5年計劃嘅員工，因為行使價分別係約94.5及86.7元，睇個勢喺今年內都難啲「上水」，呢班員工惟有攞番啲錢同埋利息，自己再努力搵第二個機會投資啦！
余絲韻