絲絲講場：港稅務負擔全球最輕

早排香港差啲被歸納做「避稅天堂」，政府要搞咗一大輪先至洗脫嫌疑，澄清香港只不過係稅制簡單，就好似剛啱均富嘅一個調查顯示，香港就被選為全球稅務負擔最輕鬆嘅地區，力壓第2位嘅競爭對手新加坡。

香港喺呢方面嘅表現近年不斷提升，喺○八年嗰陣，只有15%受訪者覺得香港冇沉重稅務負擔，到咗去年，呢個比例已大幅攀升至38%，今年更顯著改善至佔大半數嘅53%，拋離第2位新加坡嘅38%。至於世界盃冠軍西班牙嘅得分係零，即係個個都覺得該國稅務負擔大。

均富話香港嘅納稅人數好少，利得稅亦只係16.5%，制度簡單稅率又低，可以吸引到海外企業。相對之下，中國大陸就係世界上擁有最全面稅項嘅地區之一，增值稅、營業稅、個人所得稅等你聽過嘅有，未聽過嘅隨時都有，所以覺得中國大陸冇沉重稅務負擔嘅比例只有3%。

喺調查入面，全球只有6個地區有逾10%受訪者覺得冇稅務負擔。交稅即係要畀錢，啲人梗係傾向話有負擔喇，所以全球嘅平均數都係得4%咋。

余絲韻