萬眾矚目嘅農行（01288）A、H股分別喺本周四及周五上市，絲絲聽聞農行喺完成A、H股上市後，將會喺嚟緊嘅周日（十八日）於北京人民大會堂舉行大型慶祝上市酒會，估計當日場面肯定係盛況空前，大家想像得到嘅大人物都應該會到。
翻查歷史，工行（01398）○六年喺港滬同步上市，慶祝工行A、H股上市成功嘅大型儀式亦喺北京人民大會堂舉行，所以話農行好多事宜都同工行「看齊」！
工行當年上市，由於A、H股係同日上市，中港兩地嘅上市儀式當時首次現場直播，仲邀得特首破天荒出席，據聞今次農行亦有邀請特首出席在港上市儀式。除咗早上嘅上市儀式，農行H股當日亦會喺香港舉行酒會。
依家市場最關注係農行上市嘅股價表現，事關好影響H股會否行使超額認購權。行使超額認購權點解咁緊要？皆因農行必須要A、H股均行使超額認購權，集資額先至能夠成為史上最強，即超越工行成為全球集資額最大嘅新股。呢個史上集資最強嘅「榮譽」，農行志在必得，大家又點會唔關注佢上市嘅表現呢？
余絲韻