講咗咁多年，康宏理財終於「起錨」，真係替我心裏面兩個偶像──「黃主席」同「智慧陳」感到高興，能夠見證自己嘅企業由無到有，再由資本市場帶動而創造往後無窮商機確係不少企業家「心中的歌」。
我同呢間公司已經合作咗好多次，最深刻係為佢哋開班教授結構性產品解碼，講真當時都好鬼驚，因為「康記」班大帝全部都係「行業精英」，極度Demanding，教得唔好，一個唔好彩就「身敗名裂，體無完膚」，好彩大步檻過，亦都成為繼佢哋搵開明星/名人做培訓後一個極好評價嘅講者（有數據為證，可供參閱）。
當時夠膽推動呢件事嘅係「黃主席」，佢個格平時係「衰衰地」，不過呢位仁兄嘅前瞻性極高，全靠佢大膽推行先可以將新元素引入「康記」，佩服佩服！「智慧陳」係另一個我認識嘅「康記」大頭，人如其名，佢對保險、MPF市場嘅認識認第二，無人敢認第一，所以同佢吹水，我都係同佢講「炒嘢」，驚講保險唔夠佢嚟，「攻其弱，避其鋒」，我最精。
如果你睇好「康記」，即係你睇好佢哋班管理層夠「瘋癲」，乜都敢試，乜都夠膽死，「踏着別人嘅足迹，不留自己嘅腳印」，又睇吓「康記」上市後，有乜新招推出，為投資者提供超值嘅回報。
香港大學電子金融服務榮譽助理教授 徐燦傑