首要重建公眾信心
絲絲尋日聽Benjamin講，今年銀公有成35個委員會，總共有365個銀行代表開會，淨係計上半年，開會已經開咗128次，有32個會要同監管機構或政府開，扣番星期六、日及公眾假期，仲唔係日日開會？
金融海嘯後，銀行界的確係多事之秋，Benjamin話今年咁多個委員會，包括討論巴爾塞新標準、投資產品規管及銀行家薪酬等，淨係計諮詢文件都有36份，另外仲有層出不窮嘅人民幣新進展。不過佢話依家人民幣存款都仲係太少啦，至少要去到香港總存款10%先至叫做成氣候。雖然銀公手頭工作量咁大，但講到最大挑戰嘅，Benjamin話始終都係重建社會對銀行信心，果然任重道遠。
余絲韻