絲絲講場：渣打贊助「奮進行動」
渣打喺香港搞馬拉松搞得出色，每年項目開始報名後，幾乎隨處都聽到人講參加渣打馬拉松嘅話題。尋日渣打就宣布繼續贊助另類嘅運動計劃，名為「奮進行動」，呢嗰計劃都幾有意義㗎，主要係透過舉辦各類型體育活動，幫啲邊緣青年及首次犯事而重返正途嘅人，今次贊助為期三年，涉及金額九十萬元。
高層落場打欖球
渣打更出動集團執行董事及企業銀行行政總裁Mike Rees親自主持今次贊助儀式，而且仲同佢哋部門一眾高層齊齊落場打欖球。講開阿Mike，原來佢本身係欖球愛好者，尋日嘅贊助儀式喺警察體育遊樂會舉行，似乎同佢嘅一名兄弟都扯到啲關係，因為佢呢位兄弟喺香港嘅時候係做警察，同時亦係警察欖球隊成員。
阿Mike嘅個人嗜好可謂動靜皆宜，除咗愛玩欖球之外，亦鍾意打高球，又喜歡藝術、古董及閱讀。佢另外仲有一樣嗜好，相信大家未必估得到，原來呢位「賓卡」亦好鍾意耕種，過去唔知有啲乜嘢收成呢？
余絲韻