絲絲講場：星展中國開荒有成果
銀行爭住北上發展，唔少中國區嘅開國功臣已建立有規模團隊，星展中國企業銀行部總監兼董事總經理吳文誠（Timothy）話去咗內地發展8年，當初都掙扎咗成個月，好彩最後發覺冇揀錯，做得好成功。
團隊由12人變過百
Timothy話初去上海時普通話講得唔好，甚至成為咗同事年夜飯嘅「表演項目」，絲絲聽佢雖然稱呼自己做開荒牛，但一講起團隊由當初12人發展到依家過百人，不知幾有滿足感。
至於星展中國副行長兼首席運營官梁徐雁芬（Maggie）同絲絲講起，話因為爸爸媽媽都係上海人，所以佢○八年調去上海時感覺非常親切，不過咁啱當年內地雪災，得佢一個人喺上海，凍得好可憐喎。
住咗上海咁多年，Timothy話覺得上海生活空間比香港更大，文化有好濃厚東方色彩，而喺當地生活最緊要融入社會，佢平時最鍾意與好友打高爾夫球，Maggie就會跟同事去睇書法及畫展，藝術氣息濃厚。
余絲韻