好多人都話同行如敵國，好似蘋果公司嘅喬布斯及Google嘅施密特就因為手機市場之戰搞到互擦火花「暗寸」對方，不過睇嚟這種情況唔會發生喺EQ極高嘅阿里巴巴集團主席馬雲身上，事關阿里宣布集團將於九月舉行嘅「網商大會」，竟然邀請咗其潛在對手─eBay行政總裁Jonn Donahoe做主題演講嘉賓，果真體現中國人「互相觀摩、知己知彼」嘅營商智慧。
阿里集團除咗喺本港上市嘅B2B貿易網站阿里巴巴（01688）外，直屬集團系內嘅「淘寶網」及「支付寶」一直與eBay旗下「eBay易趣」及「PayPal」喺中國市場競爭。隨着馬雲明令「淘寶網」未來要走向國際，好多人都認為佢根本就將eBay視為假想敵，所以馬雲喺今年嘅「網商大會」主動邀請Jonn Donahoe做演講嘉賓，實在有啲叫人意外！
不過話分兩頭，剛被《財富》選為全球50個最聰明科技人物嘅馬雲，多年來都深知喺商場上要廣結善緣、避免樹敵嘅道理，好似阿里巴巴之前推出「全球速賣通」，為咗開拓國際市場，就已引入PayPal作為支付寶以外嘅另一支付平台，所以同行真係未必係敵國，有時要互相合作先可做到共存共榮，喺競爭中闖出自己嘅天地。
余絲韻