本港窩輪（warrant）市場向來競爭激烈，輪商不斷喺各大媒體「海陸空式、全力追擊」，贏家梗係媒體朋友啦。連第一代輪王都話重出江湖，喺Big4錢莊之一出任衍生產品嘅大Sales，計埋準備復出嘅Simon老兄，成個市場又準備get、 set、 go。
窩輪好唔好做，我就唔識講，唔好做又點會有人「漏夜趕科場」呢？中銀香港（02388）、渣打集團（02888）亦準備得如火如荼，同你班大佬死過。有個炒股王同筆者講輪商嘅策略已經去到無差異性（non-differentiation）的地步。從marketing來講都咪話唔悲哀，但係唔做又唔得。大家都知輪商數目多，但首5名輪商巿場份額已經佔有六成，剩番嘅梗係「相濡以沫」。
年初完成中大法律學碩士（中國商業法），其中一份功課叫中國窩輪市場：現在與將來。做完後，先感受到「同途窩輪人」的苦心。辛苦都係等阿爺開放內地山河，為將來祖國輪場略盡綿力。「輪商still alive，開放一定fly」。呢個亦係大家「繼續守望」嘅原因之一。
筆者阿媽，大學教授師傅都好唔鍾意我教人買賣衍生工具。我就覺得買唔買係一件事，識唔識又係一件事。兩件事應該分開講，不過當「牛三再起時、衍生滿城飛」係必然嘅事。
香港大學電子金融服務榮譽助理教授 徐燦傑