近月好多人都話「世界盃效應」令港股市況偏弱，不過要數「事件因素」對港股嘅影響，又點少得香港獨創嘅「丁蟹效應」！九二年電視劇《大時代》首播期間，港股曾大跌兩成，之後幾年每逢有「秋官」（鄭少秋）演出嘅劇集播出，港股有九成機會係反覆下滑！事隔18年大家終於再有機會驗證「丁蟹效應」嘅威力，因為TVB嘅收費電視頻道喺下周又再次重播《大時代》，絲絲嘅炒股老友聽到呢個消息後，即時腳仔軟。
「丁蟹」可算係香港人嘅集體回憶之一，特別係「大奇迹日」呢個橋段，至今仍喺現實股市之中流傳，○四年時仍任里昂證券分析員嘅劉紹文更曾寫過一份名為《Adam Cheng Effect》嘅報告，解構「丁蟹效應」對港股嘅影響，家陣就連網上嘅維基百科全書都有一篇叫《Ting Hai Effect》嘅欄目，中英並解乜嘢叫「丁蟹效應」！
不過巧合歸巧合，「丁蟹效應」未至於萬試萬靈，○六年六月呢套劇亦曾重播，期間港股反而從低位回升。佢哋嘅友台上月重播同樣係秋官主演，被視為《大時代》下篇嘅《世紀之戰》，股市都冇大冧，今次係咪靈驗就要拭目以待。
余絲韻