中港兩地嘅金融議題愈來愈多，單係今年上半年，唔同機構搞嘅金融論壇多到一雙手都數唔晒，嚟緊喺上海都有一個大型論壇，出席嘅幾乎包括所有中港兩地嘅監管機構要員。
有幾大堆頭？等絲絲同大家數吓喇，有上海市副市長屠光紹、中證監國際合作部主任童道馳、上交所總經理張育軍、深交所副總經理陳鴻橋、財經事務及庫務局局長陳家強、香港證監會主席方正及行政總裁韋奕禮、金管局副總裁彭醒棠等。
今次金融論壇港交所（00388）亦有份合辦，出席者肯定唔少得港交所主席夏佳理及行政總裁李小加。
至於其他金融機構嘅高層代表，個個亦分量十足，好似有渣打集團前主席戴維思、中國銀行（香港）副董事長兼總裁和廣北、渣打銀行（香港）行政總裁洪丕正等。
呢個咁熱鬧嘅論壇，真係配襯上海依家咁熱嘅天氣以及熱爆嘅上海世博，據講呢個論壇係政府參與上海世博嘅其中一項官方活動，所以中港兩地金融界嘅話事人都差不多嚟齊。論壇主題係「加強香港、內地與世界連繫，創建更穩健市場」，與會人士將討論中國持續開放發展、金融市場國際化等課題。
余絲韻