英國保誠（02378）買唔成AIA，股東密謀將主席韓偉民推下台，忽然傳出最有機會由大東電報局（CWC）主席Richard Lapthore出山收拾爛攤子。
大東電報局對香港人及英國人嚟講，曾經有着特殊意義，佢以前係控有電盈（00008）前身香港電訊，曾經係香港對外通訊聯繫嘅唯一服務者，更曾肩負英國與各殖民地之間嘅電報傳送使命，不過大東自從○○年先後出售香港電訊及澳洲嘅Optus後，業務就陷入低谷，而Richard Lapthore就喺呢個背景下接任大東主席。
喺Richard Lapthore領導下，大東早已一分為二，分別成為大東電報局（CWC）及大東環球（CWW）兩家完全獨立嘅新公司，CWC目前仍控制澳門電訊在內嘅傳統電訊業務，至於CWW則主力提供批發及商業電訊業務，更已獲發本港嘅固網牌照，大有機會與「昔日兄弟」電盈喺本港商業市場打對台。
Lapthore帶領大東業務重組嘅成績，成為英國保誠希望邀請佢出山嘅主要因素，估唔到保誠收購AIA呢單咁戲劇性嘅交易，帶出唔少港人嘅回憶！
余絲韻