布蘭克費恩作為全球最賺錢投行高盛嘅行政總裁，喺金融海嘯後被視為「吸血鬼」，聽證會上顯示出傲慢嘅一面，更成為「犯眾憎」人物，但原來佢都有樂善好施嘅一面。去年華爾街高層嘅捐款紛紛縮水之際，布氏嘅慈善基金會捐款卻大增25%至約170萬美元（約1,326萬港元）。
聯邦稅務資料顯示，布蘭克費恩及其妻子組成嘅Lloyd & Laura Blankfein Foundation，喺截至一月底止嘅財政年度捐款逾30次，加埋有170萬美元，當中最大筆係向佢嘅母校哈佛法學院捐獻62萬美元，以及向其兩名兒子及妻子曾就讀嘅菲爾德斯頓文化倫理學院捐出50萬美元。
你可能會話，布蘭克費恩近期形象插水，捐錢只係挽回名聲嘅伎倆，唔代表佢有善心。不過原來布氏早喺10年前已通過自己嘅基金會「靜雞雞」訂立遺產捐獻計劃，平均每年捐出130萬美元，所以佢捐錢應該唔係形象工程，反而今次加碼似係賺得多所以捐多啲。
當然，10年捐款加埋比起佢嘅天價花紅只係「濕濕碎」，喺○○至○九年間，布氏嘅底薪、花紅、股票獎勵等共有2.4億美元（約18.7億港元），每年捐百幾萬美元都好輕鬆。
余絲韻