絲絲講場：王冬勝：估中市唔使坐喺度
近期港股冇乜方向，好似冇乜邊瓣股票標青啲，搞到中港兩地嘅散戶都冇乜心水，唔多願落場，絲絲見個市成交額好多時都唔過五百億元，真係有啲心慌。呢啲時候梗係聽行內專家意見最穩陣啦，咁啱滙豐亞太區行政總裁王冬勝及大中華區首席經濟師屈宏彬出嚟講滙豐新興市場指數，絲絲當然捉實佢哋問大市走勢，不過兩人就畀咗大家一個驚人答案。
先問王冬勝點睇下半年恒指，佢就笑笑口話，若果估得中就唔會坐喺度，仲做緊呢個位。
屈宏彬照辦煮碗
之後問屈宏彬點睇大陸樓市，佢又照辦煮碗以普通話頻道，講番同一意思嘅說話。
雖然兩位專家最後都有講番對大市走勢嘅高見，但絲絲終於明白，點解依家班散戶好似盲頭烏蠅咁唔知入乜貨，因為連滙豐大班都唔敢多言，真係唔怪得個市咁靜啦。
余絲韻