世界盃好快就去到決賽嘅大日子，呢排好多球迷捱到三更半夜都要捧場，估唔到連沿海家園（01124）主席曾文仲都係狂熱分子。尋日絲絲諗住去參加沿海家園全年業績公布會，與曾主席傾吓來年集團嘅業務大計，點知主席遲遲未見影，原來佢前晚為咗睇荷蘭對烏拉圭嘅賽事，搞到晏咗起身。
業績會原本早上11點開始，不過絲絲與成班記者朋友等咗十幾分鐘都唔見曾主席出現，正以為港島例牌塞車有阻滯之時，曾主席就現身兼大聲道歉，令大家充滿疑問。曾主席即刻好誠實咁話，原來佢之前嗰晚睇波睇得太夜，所以朝早遲咗起身。
佢會後仲同絲絲講，話會再捧德國隊，希望可大勝西班牙喎！不過絲絲唔知道佢最終有冇睇直播，話晒連續兩晚捱夜睇波好傷身，所以下屆世界盃時，主席不妨效法361度（01361）嘅德政，等員工喺世界盃期間遲一個鐘先返工，咁就皆大歡喜嘞。
余絲韻