農業銀行（01288）下周五就會加入港股呢個大家庭，加埋其他國有銀行，十足大團圓結局一樣。港交所（00388）交易大堂一向有個地方掛起集資額最大嘅新股上市相片，由於位置所限，只有10個名額，農行係「世紀集資王」，理論上應該排頭位，點知交易所規矩，呢批相嘅排位只係計H股，農行嘅H股集資額輸咗畀工商銀行（01398），下星期影嘅掛牌相惟有將就一下，排第二位嘞！
根據最新嘅定價及發行股數，農行H股集資額約935億元，當年工行嘅H股集資額就達到1,200億元。睇番依家嗰十張相，清一式係國企及紅籌，一半仲係銀行股，加埋農行，變咗六成係內銀股。
有入就有出，邊個咁唔好彩逼咗出嚟？咪就係排第10位嘅神華（01088）囉。照呢個邏輯，排第9位嘅中石化（00386）都唔係好穩陣，皆因農行之後，仲有AIA嘅上市計劃，據聞佢哋想喺今年第四季上市，集資額或會達到780億至1,000億元。
AIA成功上市，自然又會插隊，到時中石化真係冇得留低，但好處係呢10位入面，終於有一間公司唔係紅籌國企。
余絲韻