書展開鑼前夕，好多電子書（eBook）嘅Apps搶住出台主打書迷市場，工行（01398）旗下工銀國際投資服務部銷售董事徐燦傑都一齊湊熱鬧，推出全新嘅《衍生物語》電子書，全面講解衍生工具玩法。佢話呢本電子書籌備咗兩個月，最花時間喺設計圖片方面，連實體書都未出，而整個製作成本約係實體書嘅三至四成。
雖然成本少咗，但徐燦傑話呢本eBook比一般金融工具書就賣平一半，唔係賺好多喎。佢同絲絲講，話推出eBook唔係為咗賺錢，而係利用「App Store」嘅平台令全球識中文嘅人都讀到自己嘅作品，「最開心係本書推出後一個禮拜，就有住喺美國及英國嘅朋友下載，以往書商好難將自己嘅書賣到外國。」依家佢就趕喺書展後出多一本《證監考試一眼通》，先出實體書，之後再推電子書。
余絲韻