內地抑壓樓市嘅措施出咗好多，原意無非為老百姓好，令佢哋唔使捱買貴價樓，不過絲絲聽朋友講，今次收緊二房新政卻間接打爛咗唔少中介人嘅飯碗，搞到要執包袱轉行，最近一個月上海有三成房產經紀頂唔順走人，釀成新一輪「轉工潮」。
之前上海樓價升得好急，當地房產經紀梗係賺唔少佣金，不過今時唔同往日，有成幾千間地產中介舖頭都靜到拍烏蠅，隨時「零成交」都唔出奇，累到一班中介銷售員喺月尾只能靠份千零蚊嘅「底薪」過活，所以佢哋有乜辦法唔向現實低頭，「拿拿臨」轉工？有行內人士仲預測，如果調控政策持續，上海中介公司可能消失一半，房產經紀亦隨時唔見一半人。
若然小型中介公司每月入不敷支嘅情況惡化落去，下一輪「關門潮」亦不遠矣，保守估計第一波關門危機喺七月至八月出現，真係愈講愈悲觀。不過絲絲諗落，其實可以試吓「東家唔打打西家」，家陣上海雖然淡市，但其他三、四線城市依然處處生機，只要肯離鄉別井去遠啲嘅城市，都應該搵到食嘅，他朝上海樓市回暖，又可以返嚟再搏殺。
余絲韻