內地地產龍頭萬科嘅老細王石唔只個名夠硬淨，原來人如其名，個性一樣咁硬淨，佢除咗係起樓高手，仲係登山高手。佢已完成攀上七大洲最高峰嘅壯舉，早前與一班老友去珠穆朗瑪峰嗰陣，仲化身環保大使，執咗一大堆垃圾走，平日嘅佢更加會用「手巾仔」，慳番啲地球資源咁話。
絲絲細個去沙灘幫手執垃圾就執得多，真係未聽過珠穆朗瑪峰呢啲極地都會有垃圾執。原來王石一行人執嘅包括167個氧氣樽，照絲絲估計，應該係途人喺呢啲空氣咁稀薄嘅地方吸晒啲氧氣，之後無力執埋個樽走，咁都情有可原。
王石原本仲想將呢167個樽放喺世博嘅「萬科館」展出，但因為安全理由拉倒咗。
回憶起登山經歷，王石就好陶醉咁話，每一次嘅旅程都係「地球深度行」，赤裸裸咁感受生態環保，有次睇到非洲坦桑尼亞吉力馬扎羅山融冰川嘅時候，佢就感受到全球暖化問題，覺得大家都應該做番啲嘢。個人環保方面，佢亦坐言起行，唔用紙巾、膠樽及紙杯，改用手巾；對於老本行嘅房地產方面，佢相信未來開發商都會更注重建築節能及住房品質。
余絲韻