市場熱線：馬鋼值博率高

昨日本地魚缸回升，點睇都係跟祖國魚缸一齊技術反彈，反彈力度除咗要睇祖國魚缸之外，更重要有成交同老利消息配合，暫時唔見到有呢兩個因素支持。恒指反彈阻力為20,150點附近，升破可再挑戰20,300至20,500點，但古勝則唔贊同有斷估專家指，港股可回升至二萬一，甚至二萬二，因為成交實在弱得緊要，魚缸冇水點成事。

大笨象應未彈完

大隻佬升多跌少，中鋁（02600）勁彈近5%至5.99元，喺眾多大隻佬中冧巴溫。公司去年七月宣布要抽水集資，原定集資百億元人仔大計，仲有一個月到期，但公司決定將批盪融資推遲一年，刺激股價反彈。不過，中銀國際指中鋁延遲抽水，只係近期祖國魚缸表現太樣衰，批盪最終落實，明年盈利將被攤薄最多7%，吹水報告評級為沽售，目標價只有4.58元，較昨日散場價再作低23%。

除咗延遲抽水，袋鼠國新總理對於重徵資源稅方面似乎有得商量，亦令近日疲弱的資源股鬆一口氣。中信泰富（00267）亦因為咁彈番4.4%，係大隻佬升幅亞軍。QQ（00700）亦升3.2%，收報134.6元，上周算係搵咗個底，隨住限制網遊消息淡化，場外衍生工具相繼行使，估計之前股價下跌都已反映。

巨無霸大笨象（00005）只微升0.7%，收報71.65元，同呢幾日累積跌逾5%相比，彈力真係弱過藥煲，主要係受歐洲業務前景唔明朗影響。不過，古勝執筆時歐洲魚缸勁彈，股價應仲有得彈。祖國移動（00941）同樣升唔多，升幅唔夠0.4%，收報77.95元，主要係基金追捧其競爭對手，祖國電信（00728），勁升4.5%，另一對手二奶電話（00762）則逆市跌0.3%。

資源價格反彈，相關股份亦錄得不俗升幅，其實在過去兩個月，資源股累積跌幅唔嘢小，現價已足夠反映負面因素，可吼位買番。上月財政部通知，在本月十五日起，取消406種商品的出口退稅，鋼鐵產品更首當其衝，馬鋼（00323）亦插水。

鋼價再跌空間細

其實呢項政策並唔係一面倒打擊鋼鐵企業，皆因北大人主要係唔想鋼材大量出口，作為一個缺乏鐵礦石原材料的國家，祖國鋼材的生產定位主要是滿足國內需求。在出口退稅政策未取消前，大量出口鋼材招致國際間貿易摩擦。海嘯後歐美鋼鐵產能利用率減少，祖國的鋼鐵產品就受到了較為集中的反傾銷反補貼調查。

其實目前鋼價已跌至鋼企現金成本水平，加上鐵礦石價格高企不下，鋼價再跌空間有限。有大行預測今年第四季鐵礦石成本有望回落，連同企業累積鋼材存貨的因素，有助提升鋼企的毛利率。另方面，全國鐵路網絡建設加速，中央又計劃今年興建580萬個經濟性住房單位，估計全年鋼鐵需求將增加10%，有助穩住鋼價。

其實鋼鐵股前景唔係太曳，但在鋼價未重返升軌，而鐵礦石價格未見回落前，在下建議宜逢低吸納，馬鋼可候3.3元附近上車，股價回升至3.8元樓上並不困難。

戰報

中交建（01800 +6%

古勝上周五指中交建估值便宜，當日低位7.06元，昨日一度升過上7.5元，升幅逾6%。

首華財經（08123）+5%

帥哥昨日指首華財經網絡有勢突破，昨日果然隨大市做好，更高見0.4元，較低位0.38元升5%。

古勝