阿姐「熱咖啡」簡直係上世紀八十年代經典金曲，無人不曉。每次一出場都為大家帶來新驚喜。亦都為「飲咖啡」帶來全新的啟示。好似華潤創業（00291）近年就積極整合旗下零售消費業務，繼將旗下雪花啤酒打造成內地一哥品牌後，最近看準內地對消費品味、生活時尚的提升，以3.26億元向其士泛亞（00508）收購Pacific Coffee 80%權益，從而「大踏步」進軍咖啡連鎖店業務。唔使講梗係想運用集團在內地的優勢與Pacific Coffee品牌力量達至win-win之境，同宿敵星巴克死過。
雖然Pacific Coffee在去年錄得同店銷售倒退及虧損，但香港發展仍然健康，最重要係華創會全力發展內地市場。加上消費者對咖啡的「本能反應」提升，飲咖啡亦都成為一種生活品味，阿爺境內的咖啡消費市場確係可以容納多過一個「超級巨啡」品牌。
由於華創在內地超市業務及網絡已經發展成熟，預期在租務及Pacific Coffee分店選址上更加係錦上添花；正所謂「合縱連橫、左右逢源」。華創過去用15年做起雪花啤酒成為內地第一品牌，超市業務6年時間就達標，對於新加入的Pacific Coffee成為內地咖啡連鎖店龍頭都係指日可待，斷估打破華創先前紀錄一定得。熱咖啡，為有品味的同志們斟到瀉。正！
香港大學電子金融服務榮譽助理教授 徐燦傑