當年「壞孩子基金」ＴＣＩ入股領匯（00823）之後，大家都諗住剝花生等睇戲，睇吓ＴＣＩ點樣發功將領匯煎皮拆骨，不過時至今日都冇乜特別事發生，反而係走嘅走，散得嘅散，ＴＣＩ自己都已經淡出領匯，仲不斷減持，而當年嘅關鍵人物ＴＣＩ亞洲主管何志安，佢離開咗ＴＣＩ後自己搞咗檔對沖基金，規模已達到一億美元喇。
何志安檔嘢今年至起動，初時規模只係四千萬美元，不過首半年回報達百分之九點九，遠勝市場平均蝕錢嘅成績，所以愈做愈大。還記得當年ＴＣＩ派咗何志安入董事局睇住之後，貫徹ＴＣＩ一向善於壓迫唔同企業嘅風格，當時領匯主席鄭明訓被踢出局，連當時嘅行政總裁蘇慶和最後都要起身呢兩件事，唔知同ＴＣＩ作風有冇關係。
依家何志安就專注自己嗰檔對沖基金，佢哋比一般對沖基金投資期長啲，大部分錢都會鎖定三年，而且管理費以及與投資回報掛鈎嘅表現費又低啲，表現費仲會斬開三年拎，如果之後投資失利，仲會退番畀客添。
余絲韻