中國經濟欣欣向榮，唔少富豪想盡辦法好好培育佢哋嘅下一代，所以呢排內地好興搞「富二代」培訓班，有啲甚至標榜話有京城四大才子之稱嘅前人民銀行貨幣政策委員會委員、現任中國經濟體制改革研究基金會秘書長樊綱任教，連著名文化人于丹個名都畀人登埋出嚟添，不過啲培訓費就好「乸脷」，由一萬幾千到六十六萬八人仔不等。家陣好多十幾廿歲嘅富二代，每兩個月就要飛一次北京上5日堂，希望可以擺脫「敗家仔」形象。
一個課程嘅價錢由萬幾蚊去到最貴66.8萬都有，啲學費貴成咁，究竟學乜嘢呢？咪就係一條龍，教完佢哋做生意及管理等基本功後，仲介紹埋啲富豪或知名企業家畀佢哋，等佢哋有渠道可以喺大陸富豪圈子開展人際脈絡同埋做生意。不過，學費一萬幾千嗰種就只係學吓啲企業文化塑造咁，其他配套就冇乜嘞。
根據培訓業資深人士估計，目前富二代培訓市場已經有近百億營業額，因為啲錢好好賺，據講唔少人都想做呢門生意，如果要幫襯，真係要做啲工夫，研究吓邊間至有真材實料。
余絲韻