聯想（00992）主席柳傳志一向溫文敢言就係人都知，早兩日佢喺接受訪問時就同記者話，好彩蘋果公司行政總裁喬布斯嘅脾氣好差，而且唔關心中國市場，如果佢哋花晒啲精力喺中國市場嘅話，聯想都會幾麻煩。
佢仲預計一年之內，中國將成為全球最大嘅市場，所以近年好似惠普、戴爾等廠商已經將更多資源投入內地市場，但蘋果公司唔願意接受呢種邏輯，佢仲話「喬布斯係一位天才，但喺我嘅標準中就例外，事關一名經理人係一條串起珍珠嘅線，但喬布斯本人係一粒大珍珠！」
柳董覺得聯想嘅樂Phone喺競爭中比起iPhone有優勢，內地用戶合法購買iPhone嘅唯一渠道係透過聯通，但又因售價比水貨高好多，所以聯通嘅iPhone銷售麻麻，聯想嘅樂Phone就更適合內地消費者。言下之意，即係蘋果公司喺內地根本唔係聯想對手啦！
對於柳董上述言論，蘋果公司就反擊話，佢哋將於上海開設新零售商店，而且計劃明年底前喺中國加開25家零售店。其實佢哋啲管理層早排講過，會將中國市場視為最主要嘅增長機遇，不過柳董好似唔睇好佢哋喎。
余絲韻