絲絲講場：張華峰愛駒股友啱聽

恒豐證券董事總經理張華峰間大寶號早前被證監會「將軍」，指公司喺處理內地客戶帳戶時出現內部監控不足，不過張華峰依家嘅心情已經平復。身為馬主嘅佢，佢隻愛駒將於下周三（十四日）出賽，如果贏咗，應該可以沖喜吓呢！

張華峰隻馬個名非常啱聽，尤其係對於股民，聽咗之後一定會從個心度笑出嚟。咁佢隻馬究竟叫乜名呢？咪就係叫做「創新高」囉。唔講唔知，呢個咁啱聽嘅馬名原來係佢嘅愛將，即係恒豐證券研究部董事林家亨幫佢改嘅。佢哋做股票呢行，當然希望指數日日創新高，股民數量及佣金收入亦一樣創新高喇，張華峰對隻馬嘅期望不言而喻！

依家財經界最熱門話題，其中之一肯定係農行（01288）即將上市，咁張華峰有冇捧場？點知佢就話農行唔使咁心急買，等上咗市之後睇定啲先決定都未遲，始終農行係最遲上市嘅國有商業銀行，佢亦話農行孖展認購反應一般。

至於世界盃，張華峰就坦言冇乜點睇，佢都係鍾意籃球多啲。上海世博佢早前已參觀咗，行咗唔少展館，最深印象始終係中國館嘅電子動態版《清明上河圖》，感覺好震撼，而香港館佢就話冇乜大驚喜。

余絲韻