市場熱線：匹克逆市突圍

本地魚缸彈唔起，好大原因係欠缺成交動力，唔計創板成交額只有399億元，水盡鵝飛，個市點會升得起。恒指上周已完全回補之前個上升裂口，古勝滿以為周一晚花旗魚缸休假，好友或可以反擊。豈料唔夠成交配合，外圍魚缸又繼續腳軟，照情況睇，繼續向下尋找支持，機會大過反彈，恒指下一支持位為19,600點，呢個位失守，要向下移至19,400點。

港口碼頭股走勢弱

本地魚缸拍烏蠅，皆因農行（01288）招股集資額近千億元，加埋交行（03328）剛完成供股，中行（03988）又公布供股計劃，幾間紅色錢莊齊齊抽水，魚缸當然缺水嚴重。大隻佬表現好壞參半，巨無霸大笨象（00005）落實一項蚊型收購，對股價當然唔會有刺激，腳軟跌0.7%，收報71.15元，睇樣70元關好快失守。

祖國移動（00941）則收報77.65元，跌幅輕微；兩個對手二奶電話（00762）跟祖國電信（00728），分別逆市升2%及1.3%。衰足一個月的富士康（02038），反彈2.6%，成為大隻佬升幅冧巴溫，收報5.01元，就算係死貓都識彈。祖國經濟增長放緩，港口碼頭股軟弱無力，「貓貓狗狗」（01199）跟招商局（00144）各跌1.5%及1.9%，公仔圖表走勢愈嚟愈難睇。商品類股個別發展，中鋁（02600）氧化鋁產品減價，拖累股價跌2%，收報5.71元。

揀股要嚴格篩選

祖國限制現貨煤炭價格，以遏止上半年已累升唔少的煤價再發狂，呢個消息上周重擊煤炭股，昨日卻見反彈。神華（01088）上周顯著下跌一成後，昨日微彈0.5%，小巫見大巫。本地地主繼續跑贏魚缸，皆因在息口保持低企下，磚頭銷情未受影響，過去一個周末，唔少新盤推出，市場反應熱烈。

古勝早於本年初，已表示今年魚缸走勢反覆，唔似得舊年咁順風順水，首季見完低位後45度角斜線向上。去年看官若賺埋唔少，今年要識得持盈保泰，穩陣計要買唔受調控政策影響股份。

之前強調消費股係其中一類可以逆市突圍的股份，匹克體育（01968）已派成績表，業績總算見得人，加埋呢兩個月世界盃熱潮，有助推動次季銷售，加上全年定單增長理想，值得睇高一線。

籃球鞋市場執牛耳

集團目前在祖國擁有超過6,000家零售店舖，雖然集中在二三線成市，但分銷網絡相當之廣，即使主要生產成本，跟勞動力和原材料價格均見上升壓力，但隨着祖國居民收入增加，對體育用品需求與日俱增，匹克的品牌已建立一定知名度，料可繼續促進今年盈利錄得高增長。

匹克亦是祖國籃球鞋市場龍頭，市佔率接近兩成，目前已成功邀請12位NBA球星作為代言人，產品市場定位鮮明，致力塑造成籃球專業形象，有助保持其在業內的競爭力。

戰報

國中控股（00202）+19%

小尾上月三十日指國中業務惹憧憬，當日低位0.72元，昨逆市做好，以0.86元收市，累升幅19%。

昂納光通信（00877）+7%

高仁上周三推介昂納光通信，昨高見3.61元，較推介當日低位3.36元升7.4%。

古勝