企業銀行輔助中小企創業成長嘅故事，喺香港真係多到數唔晒，絲絲尋日與恒生副總經理兼企業及商業銀行業務主管陳力生（Nixon）傾開偈，先知道Nixon本來嘅志願都係創業經商，當初諗住入銀行累積吓經驗，點知一做就做咗三十幾年。
Nixon話佢爸爸係做出入口生意，佢讀完大學本來都想好似爸爸咁，做一個成功嘅生意人，但初出茅廬乜都唔識，咪諗住入銀行接觸一下各行各業，擴闊吓人脈，點知做完外資行見習行政人員之後，一加入滙豐就做咗33年，連當初創業嘅念頭都掉低埋。
點解做銀行做到唔捨得走？原來Nixon覺得做銀行好有挑戰性，話當年曾以三十幾歲之齡，接替一個夠60歲退休嘅主管負責管理金庫，對住一大班下屬又係老前輩，佢惟有加倍努力，仲改革埋金庫管理，成績做得好，夥計自然服晒佢，就係呢份滿足感，佢先決定繼續做「賓卡」。
佢依家仍幹勁十足，全因為樂天性格，唔會將工作問題帶回家，令自己可真正享受天倫樂，而佢嘅另一個減壓方法係與三五知己打麻雀。佢兩個女已去咗英國及澳洲讀大學，有冇要求佢哋揀讀商科？佢笑說：「我喺公司嘅影響大過喺屋企！」
余絲韻