有「中國民營海外上市之父」之稱嘅瑞銀投資銀行亞洲區主席蔡洪平，好突然咁宣布離職，據說佢會籌辦一個20億美元嘅私募基金，再喺投資界大展拳腳。
絲絲聽聞，「老蔡」請辭已傾咗兩個月，傾妥之後就向瑞銀香港總部發咗一個電郵，交代離職原因係「過去3年都沒有休息，該休息一下了」。佢日常嘅工作將由目前亞洲投資銀行業務聯合主管金弘毅（David Chin）暫代。
有內地媒體搵到「老蔡」，佢聲言呢個唔係倉促決定，已經55歲嘞，該重新思考未來發展。佢會休息一至兩個月，利用呢段時間研究一下金融危機後全球經濟嘅發展趨勢，做一啲行業研究，特別係金融行業未來發展趨勢及挑戰，之後就會定下未來5至10年嘅發展計劃。
佢係咪會喺瑞銀全退仍未清晰。之前高盛嘅胡祖六、摩根士丹利嘅羅奇，離開常任職務後轉任公司嘅其他職位，保留跟原來機構嘅關係，呢種藕斷絲連嘅做法，對大家都有好處。
余絲韻