渣打本月開始正式成為英超球隊利物浦嘅新贊助商，以後喺英超比賽就會見到渣打個生招牌，渣打主席莊貝思仲寫咗封信畀利物浦球迷，原來渣打員工以及1,400萬名客戶入面，都有唔少係利物浦fans，睇嚟渣打加埋利物浦又可以大玩交叉銷售。
莊貝思喺信函內真係對利物浦讚不絕口，佢話利物浦係英國足球史上最成功嘅隊伍，又擁有國際化嘅球迷，對於可以印渣打個名喺利物浦件衫度感到非常驕傲。莊貝思既然提出渣打員工、客戶及利物浦球迷身份重疊，睇嚟未來淨係賣波衫，靠渣打呢個品牌都可賺到笑！
渣打一直睇準新興市場，莊貝思嘅信函亦講明發展策略，渣打近幾年畀人嘅印象一向都係高瞻遠矚，睇嚟利物浦都要生生性性，心口掛住渣打個名可能加幾分肉緊，分分鐘可以問鼎未嘗到手嘅英超冠軍添。
余絲韻