政府嘅授勳名單中，港交所（00388）「連中兩元」，主席夏佳理及前行政總裁周文耀分別獲頒授大紫荊勳章及金紫荊星章，唔知港交所會唔會有慶祝活動呢？今次兩人獲勳，用「升呢」嚟形容最貼切，因為夏佳理本身已攞咗金紫荊星章，而周文耀本身就有銀紫荊星章，咁仲唔係「升呢」？
數數手指，港交所前主席李業廣之前已獲授大紫荊勳章，而港交所董事局內原來有多名董事已獲星章，好似張建東、史美倫、鄭慕智、施德論已獲金紫荊星章，陳子政亦獲銅紫荊星章，再加上許照中、郭志標係太平紳士，李君豪獲比利時官佐勳銜，港交所都算係最「星光熠熠」嘅機構之一。港交所係本港最重要嘅金融平台之一，董事局又一向以有多名行政會議成員見稱，董事局內個個有頭有面，膊頭有粒花有乜出奇？
政府讚揚夏佳理領導港交所推展多項措施，提高證券市場水平及質素，並提升香港嘅國際金融中心地位；至於周文耀就把香港建立為內地及眾多企業嘅首選融資中心，任內帶領港交所上下緊守崗位，應付近年金融海嘯，並發展港交所成為國際級嘅交易所。
余絲韻