國美（00493）主席兼總裁陳曉上周向外講過公司未來5年大計，佢話為咗重建外界對國美嘅信心，會與前創辦人黃光裕劃清界線，但絲絲尋日睇通告，公司董事會通過咗陳曉辭去總裁一職，只留任主席，公司執行副總裁王俊洲就獲委任為總裁，昨日起生效。公司轉過頭起用黃光裕嘅舊部屬王俊洲任總裁，此舉引起市場各種揣測。
據公司解釋，分開主席及總裁職位可進行強化管理效率，絲絲知道，根據上市規則嘅企業管治要求，公司主席及總裁職責要分開，最好唔好由同一人擔任。相信好多人都知，現任主席兼總裁陳曉係臨危受命接手代理主席一職，與副總裁王俊洲為首嘅高管並肩作戰，共同面對黃光裕事件、金融海嘯等風風雨雨，又要周圍搵錢還債，好彩吉人天相，喺陳曉及王俊洲嘅帶領下，引入咗貝恩投資，仲解除咗債務危機，重振國美聲威。
依家國美發展已漸復正軌，今後陳曉就主要負責公司戰略嘅策劃以及執行效果嘅評估，王俊洲則負責公司戰略嘅推進及實施結果，即係話今後兩人分工合作。
余絲韻