絲絲講場：港燈橙軍義工迎世盃
近日熱門話題離唔開世界盃，出晒名係球迷而又好有善心嘅港燈（00006）董事總經理曹棨森，就用踢波嚟比喻做義工，佢話除咗要有技術、戰術及團隊精神之外，最重要係全情投入，仲好似世界盃「上身」咁話，成隊義工着晒橙色制服，似足勁旅荷蘭隊！
義工隊重組6周年
為咗迎合世界盃，港燈早排就用「踢出世界波」作主題，搞咗個義工隊重組6周年活動，嘉許優秀員工及部門。絲絲一早聽講曹生係足球迷，佢話當日一見到活動會場布置，加埋個個義工都拎住唔同國家國旗，爭啲就以為自己去咗南非，佢仲話嗰日成班義工都着晒橙色制服，出去服務嗰陣好易畀人誤會係荷蘭隊喎。
除咗活動之外，港燈向每名出席員工送嘅紀念品都好有心思，除咗有用足球作主題嘅襟章，仲有特別設計嘅計步器，有紀念價值之餘，仲可以鼓勵同事做多啲運動。
曹生話做義工其實同踢波差唔多，除咗要有技術、戰術及團隊精神全情投入都好重要，佢仲話希望今年可以多啲親身參與，與同事們一齊關心社會上有需要嘅人喎！
余絲韻