市場熱線：旺旺內需首選

本地魚缸呢幾年已由資金主導，水盡鵝飛，在缺乏資金支撐下，本地魚缸升唔起。農行公布A股定價區間，缸湖傳聞話招股價為2.52元至2.68元，詳情可以睇番老記報道。

農行集資規模屬重量級，諗都諗到將凍結以千億計資金，仲要加埋呢期世界盃因素，古勝預咗本地魚缸拍烏蠅。口痕友話入場炒股不如賭波，尤其分組賽爆大冷，唔少球迷話要在餘下賽程追番條數，個個睇波捱眼瞓，朝早邊有精神再入魚缸搏殺。

芬佬冷落祖國移動

昨日本地魚缸又係悶局一場，加上呢個星期有一日休假，缸邊友更無心戀戰，大隻佬個別發展，表現乏善可陳。二奶電話（00762）表現突出，芬佬無視其估值已高，繼續冷落祖國移動（00941），高追二奶電話。由於呢幾個月二奶電話3G上客量跑贏祖國移動，加上集團正洽商在祖國引入令全球瘋狂的iPhone 4跟iPad，難怪缸邊友對二奶電話有咁高期望。

「息魔」未有資格現身，加上屋仔市場銷售又轉活，本地地主表現理想，相反紅色地主則有些少腳軟，皆因北大人指對於調控祖國屋仔市場帶來的影響有準備，調控唔會半途而廢。投資者望相關政策更清晰，即使紅色地主估值已頗為便宜，目前仍觀望，貨平亦無人搶。

講嚟講去，紅色分子幾時都受國策影響，古勝今年多次強調，要買受惠國策，或唔受調控政策影響的股份。中國旺旺（00151）係內需股，受惠於祖國擴大內需政策，加上人均收入持續增加，對佔消費比重最大的食品行業有利。至於曾被質疑產品種類過多的旺旺，今年反而受惠於世界盃舉行。皆因睇波期間，零食跟飲料的銷售額定有增無減，旺旺多樣化的食品，包括米果食品、果凍等休閒零食，又有銷售乳品類及其他飲料，甚至銷售酒類，林林總總的零食飲料，肯定賣個盆滿缽滿。

積極開拓農村市場

祖國呢幾年興起搞乜乜下鄉，物物下鄉，旺旺亦在過去三年推出「送旺下鄉」策略，今年政策持續，積極提升農村市場滲透率。旺旺又成功推出「口袋便利包」，以針對性包裝特色贏取消費者歡迎，公司今年乘勝追擊，推出定位更清晰，口味獨特的口袋包飲品和非油炸米麵產品，可望爭取更佳表現。旺旺目前的產品已在祖國食品和飲品市場建立穩固基礎，「送旺下鄉」跟「口袋便利包」的成功，進一步鞏固其行業龍頭地位。

戰報

華電國際（01071） +10%

股博士本月十五日指華電具留意價值，當日低位1.77元，昨股價已升上1.96元高位，累積升幅有10%。

大同集團（00544） +5%

古晨昨日指大同有異動，昨日果然繼續做好，低位0.38元，最高0.4元，單日升幅已有5%。

古勝