孖妹缸湖遊：內銀粉絲農情轉淡

反對派：水位唔多 恐有排守

本港散戶向來係內銀股嘅忠實「粉絲」，孖妹問十個人，通常有一半人以上嘅投資組合都有工行（01398）、建行（00939）及中行（03988）等內銀股。不過面對農行即將招股，大部分散戶嘅答案竟然係「唔抽啦」、「睇定啲先算啦」、「到時有錢咪抽囉」，睇嚟佢哋對內銀股有「變心」迹象喎。

或者唔係所有獲「阿爺」撐腰嘅國有銀行，上市後都即時有運行，因此搞到「粉絲」個心「囉囉攣」。喺○六年上市嘅工行及中行，第一日掛牌股價升15%，對「粉絲」有晒交代；至於○五年上市嘅建行，雖然獲保薦人積極護盤，令首日股價得以平收，但股友要守成近兩個月，先等到一成嘅升幅。

放大圖片

放大圖片

當佢係「長途伴侶」

從數據分析嚟睇，農行嘅盈利增長及成本控制呢兩方面其實唔係太出眾，較「三行」——工行、中行及建行遜色，呢樣係令股友卻步唔抽嘅原因之一。港大電子金融服務榮譽助理教授徐燦傑（Jeslie）點睇呢？

Jeslie︰今年農行首季盈利增長38%，與其他內銀股比較，唔係特別出眾；去年底成本收入比率係43%，高於「中工建三行」，成本控制要落多啲苦功；「三農」（農業、農村和農民）貸款壞帳率亦較已上市的「七行」為高，所以要達到「今日農市，明日城市」嘅宗旨，確實係一個好遠嘅遠景，短炒「水分」唔多。

高妹︰農行成績表未夠靚，但勝在有中央支持，會唔會加番啲分？

Jeslie︰農行係政策銀行（Policy Bank），背負嘅內地政策太多，以往聽從「阿爺」意旨，對貸款批核唔會有太多審計，但農行嘅「三農」定位清晰，日後盈利可以增長幾多，就要視乎公司管理層嘅策略，如何調配資源，要從「三農」方面增加貸款額度提升市佔率，相信要等一段長時間先見到成果，所以買農行就要當佢係「長途伴侶」。農行中長線有投資價值，若招股價以下限定價，散戶就不妨一抽。

支持派：情繫內銀「例飛」捧場

要做「長途伴侶」，當然要講感情。所謂情人眼裏出西施，愛情係令人盲目嘅，有咁多民企及國企來港集資，睇嚟佢哋好重視香港呢個市場，肯「為國捐軀」嘅內銀股「粉絲」，點都會「回禮」支持。

首日料升5%至10%

Jeslie︰大部分人對內銀股都存有情意結，上周一見到投資氣氛依然濃厚，市場資金仍多，估計農行掛牌會交出可接受嘅成績，首日上市股價「潛水」嘅機會唔大，預計會有5%至10%嘅升幅。農行上市之後，「阿爺」完成國有銀行最完美嘅畢業禮，目前國有銀行嘅市佔率約達80%，隨着內地金融市場逐步多元化，四大內銀有可能聯手推出窩輪等衍生工具，鞏固市場地位，因此農行是值得長揸。

好多人話世界盃月份股市淡靜，較少人有心機炒股，但上周一中央「出口術」話改革人民幣匯率機制，「人仔」即時狂炒，當日港股成交額亦一下子谷到逾900億元，大家都睇到，「芬佬」、大戶等唔係冇錢，亦唔係唔想炒股，只不過等緊機會，農行可能會畀到大家一個「翻身」嘅機會。

「工行粉絲」──散戶曾生：

我曾抽過工行兼長揸年半時間。至於抽唔抽農行，暫時都係抱觀望態度，好大機會唔抽，因為好多股票都睇唔到前景，依家我哋炒得好短線。

「建行粉絲」──泓福資產管理研究部主管及執行董事鄧聲興︰

抽中建行後，我一直長期持有，喺低位亦曾經增持，目前一股都冇賣過出去。中央大力發展農村經濟，農行喺農村市場有一定嘅市佔率，若定價係市帳率約1.6倍，預計有唔錯嘅上升空間，我都會入飛，除非市帳率升到2.3至2.4倍，否則中長線都唔會考慮沽出。

「中行粉絲」──散戶鄺小姐︰

抽到中行後一直冇放，結果以低於招股價沽貨，但之後出入幾次都賺番少少。近排咁多新股跌破招股價，有錢都係撈其他股份好過，我唔信農行上市後狂升上去，畀到一手你又賺得幾多？一手入場費約3,500元，就算升一成都係賺350蚊！計埋一般用黃表抽嘅100蚊手續費，唔賺得好多。

「三行粉絲」──散戶陳先生：

依家市場上有咁多「鑽石股」，農行就乜嘢世面都未見過，加上咁多人去爭，不如執吓其他股票仲好啦。不過，以前我都有抽「中工建三行」嘅新股，或者會抽番一、兩萬股農行玩吓嘅。

僅28%散戶上半年贏錢

受歐債危機拖累，今年上半年環球股市表現無復當年勇，恒指年初至今仍跌5.4%，散戶嘅股票投資成績如何？據今期《東方產經》網上民意調查，截至上周末晚上6時，28.8%散戶話上半年有錢賺，話蝕錢嘅佔54.6%，平手嘅佔15.1%，餘下嘅1.5%話冇投資股票。

高妹、莉莉

若有料報畀高妹同莉莉或有嘢問，可電郵money.biz@opg.com.hk