市場熱線:領匯防守力強

花旗魚缸上周五晚變動不大,道指雖一度跌71點,但尾市收復大部分失地,收市只係小跌8點。而上個禮拜五港股交投繼續淡靜,恒指埋單跌42點,全日成交金額亦只有514億元,市場明顯缺乏焦點。期指聽日結算,加上花旗魚缸又無乜啟示,相信港股只會喺現水平窄幅上落,難有突破。

今個禮拜市場焦點應該會落喺禮拜三開始招股嘅農業銀行(01288)身上,農行作為內地四大商業銀行之一,國際配售反應似乎唔錯,據悉超額認購達七倍,所以正式公開招股,應該可以打破近日市場的悶局。

騰訊元氣有待恢復

QQ(00700)周五升2.69%,收報129.7元,成為升幅最大嘅藍色大隻佬。QQ經過近排嘅下挫後,元氣已大傷,相信要一段長時間先至可以復原,短期嚟睇都只會係有波幅無升幅,所以暫時對佢唔好有憧憬。

大市經過近日的反彈後,二萬一關口阻力似乎唔輕,但向下又有一定支持,正所謂升唔起跌唔落,所以家陣都係揀番啲防守性較強嘅股份比較穩陣,而領匯(00823)就有不俗嘅留意價值。

領匯月初公布咗截至三月底止嘅年度成績表,期內可分派收入有21.34億元,按年上升17.3%,末期每基金單位分派49.02仙,連同上半年,全年共派97.37仙,較上一年度增加15.9%,都算慷慨。

業務穩陣派息慷慨

二○一○財年,領匯旗下有六個商場完成裝修,相信未來租金收入會有顯著嘅增長,前景當然可以看高一線,難怪多間大行都睇好佢。

花旗上個禮拜就發出研究報告,首次予領匯「買入」評級,認為領匯營運公共屋邨商場同埋停車場,業務具防守性,再配合資產改善及提升計劃,相信未來可分派收入將維持雙位數增長,而且5厘股息率回報吸引,所以予其「買入」投資評級,目標價24.07元。

領匯進可攻,退可守,所以一直有唔少捧場客,尤其是在低息環境下,亦吸引咗一班好「息」之徒。早前一度升過上20.65元,之後回落,但喺20日線水平有唔錯承接,而上星期五逆市上升之餘,成交亦見增加配合,睇格局隨時會有突破,中線不難升抵花旗目標價24.07元,不妨喺20元樓下收集,止蝕位18.8元。

戰報

文化中國傳播(01060)+12%

古晨本月十五日推介的文化中國,推介當日低位0.7元,上周五逆市呈強,最高升過上0.79元,累積升幅12%。

遠東發展(00035)+8.2%

股博士上周四指遠展待釋放潛在價值,股價連續兩日做好,周五高見2.22元,較推介當日低位2.05元升8.2%。

古勝