絲絲講場：恒生私銀豪宴箍貴客
亞洲愈嚟愈多百萬富豪，香港打正旗號要做財富管理中心，自然吸引好多國際甚至中資私人銀行進駐。恒生（00011）日前就豪宴150名特選私人銀行客戶，8道菜配搭8款名酒，並同場展出40幾件國畫、水墨畫及藝術珍藏品，務求透過品酒、賞畫，與貴客打好關係。
做得私人銀行客戶，全部都係見慣世面嘅「識歎」一族。恒生今次一連兩晚舉行豪宴可謂不惜工本，除咗由國金軒前行政總廚、現任恒生「博愛堂」總廚陳錦成設計菜單，仲搵嚟專業品酒師周國明為8道菜配襯餐酒。
佳餚名酒精心配搭
恒生助理總經理兼私人銀行及信託服務主管李佩珊（Rosita）話，佢哋今次總共開咗280支靚酒，仲預備咗千隻酒杯，至於用咗幾多錢，佢笑言並唔重要，最緊要係夠心思。
佢仲話為咗盡善盡美，自己親自試咗7次菜。值得一讚嘅係，佢哋棄用魚翅入饌，實行食得既有品味又環保。
余絲韻