絲絲講場：安踏贊助長跑大陣仗
內地體育用品商為咗提升品牌知名度，經常會贊助體育比賽，好似361度（01361）贊助亞運會、李寧（02331）贊助中國羽毛球公開賽等。今次安踏體育（02020）就贊助「第廿四屆奧林匹克日長跑」，呢個活動於上周六喺廈門舉行，熱愛運動嘅安踏主席丁世忠亦都有份落場，聯同四百名安踏員工一齊參與長跑。
絲絲知道丁總一向鼓勵全民運動，佢哋去年都有贊助奧林匹克長跑，今年亦繼續支持。
呢次長跑係宣傳奧林匹克精神，永不止步，同時推廣全民健身運動。今次長跑有成二萬人參與，係歷屆最大規模嘅一次。
體育明星代言人落場
安踏仲邀請咗體育明星代言人參與長跑，包括自由式滑雪運動員李妮娜、雙人花樣滑冰運動員張丹及張昊、馬拉松跑手陳榮等，他們全部着上安踏設計嘅五種顏色運動服，分別為藍、綠、紅、黃、黑，代表奧林匹克嘅五環顏色，睇嚟安踏對設計產品都好有心思。
余絲韻