王朝酒業（00828）投資咗1.8億元喺天津興建嘅酒堡已起得七七八八，原來呢個外貌似足歐陸古堡嘅酒堡，係公司主席白智生用咗成年時間設計，估唔到白總除咗對管理以及紅酒有心得之外，仲識得設計，真係瓣瓣掂。
白總話，佢哋○八年決定要興建呢個酒堡，於是喺同年底動工，當時剛啱撞正金融風暴，造價平過依家成半，而佢因工作關係經常喺歐洲四圍遊歷品酒，見盡大大小小唔同嘅酒堡，今次呢個酒堡就由佢加入咗好多自己嘅意念設計而成。
以酒堡嚟講，王朝呢個剛啱起好嘅係全世界最大，佔地有成10萬呎咁大，裏面有技術中心、酒庫、葡萄酒歷史館、雪茄吧、葡萄酒SPA以及度假酒店等，總之與葡萄酒有關嘅嘢幾乎應有盡有。
白總話希望呢個酒堡可肩負喺中國介紹葡萄酒文化嘅使命，提高內地人對紅酒嘅認知，提升質素。
除咗呢個酒堡外，白總經常會客串設計王朝出品嘅葡萄酒酒樽，好似佢哋嘅梅鹿輒乾紅葡萄酒個樽就由佢設計，望落真係幾有氣派㗎。
余絲韻