絲絲講場：港交所舉杯賀上市十載

現任主席夏佳理喺台上致辭時亦不忘向李業廣致謝，笑說港交所有今日要好多謝佢。梗係喇，李業廣當日排除萬難，先成功說服經紀令港交所上市喎。

除咗李業廣之外，財經事務及庫務局前局長馬時亨等亦有到賀，不過，港交所兩位前行政總裁周文耀、鄺其志以及證監會前主席沈聯濤等就未有到場。

夏佳理：捱過唔少低潮

講番港交所十周年感受，夏佳理坦言過去經歷咗唔少低潮，好似沙士、金融海嘯等，但港交所都能成長，咁未來10年將有乜嘢挑戰及機遇？佢就話交易系統係其中一個，因為只要睇吓上月初美國發生指數急挫事件，到依家大家仍未好清楚掌握究竟當日發生咗乜嘢事就知。至於未來嘅機遇，就梗係搵多啲公司來港上市啦。

佢話香港地理真係好優越，坐飛機5個小時就可到達人口佔全球三分之二嘅地方，所以要把握地利吸引更多公司來港。

近期熱門話題除咗「起錨」，就梗係世界盃，夏佳理一聽到世界盃，就話自己冇乜點睇。點解？佢話睇見英格蘭輸波，就冇乜心機喎！咁佢依家睇好邊隊波？佢就話係巴西及阿根廷，非常巧合嘅係，港交所近期亦好積極推介巴西公司來港呢！

余絲韻